A mund ta zbehin namin historik të kryeministrit të parë shqiptar, ata që mendojnë njëjtë si “Levica”?

Vetëm hapja e debatit për një kryetar të mundshëm të Qeverisë me përkatësi etnike shqiptare shënoi një hap para në pozicionin e shqiptarëve në Republikën e Maqedonisë së Veriut. Qarqet nacionaliste maqedonase e morën çështjen si utopike, shqiptarët si diçka që kishte ardhur koha, të tjerë me inate politike se mund të ishte shqiptar, por jo nga radhët e Bashkimit për Demokratik.

Marrëveshja politike për formimin e Qeverisë aktuale solli vendimin se do ketë kryeministër shqiptar në 100 ditëshin e fundit të Qeverisë aktuale.

Nga 28 janari i vitit 2024, në kolltukun e Kryeministrit të Maqedonisë së Veriut do të ulet Talat Xhaferi, personalitet politik i shquar për qasjen institucionaliste ndaj çështjeve politike. Dhe, po, shqiptar. Ashtu siç ishte zotuar partia e tij BDI, respektivisht i pari i kësaj partie Ali Ahmeti.

Tani, ata që çështjen e trajtonin si utopike janë trazuar sa më s’ka. Utopike dje, reale sot. Janë trazuar dhe po vjellin vrerë edhe disa shqipfolës- zakonisht për shkaqe të inateve politike dhe pamundësisë për të qenë pjesë të historisë, që padyshim do të lë gjurmë.

Preokupuese janë tendencat e shqiptarëve me tendencë përçmuese. Askush nuk duhet të jetë i brengosur se “levo- krillat” ultra maqedonase ulërijnë. Hiç, aspak, sepse nga ata është e pritshme dhe jo befasuese.

Lajmet e rreme me bollëk dhe komentet e ndryshme për peshën e Kryeministrit shqiptar Talat Xhaferi, nga goja e shqiptarëve vetëm për ta defokusuar momentin historik, nuk janë të hijshme, madje janë irrituese: “pse një shqiptar të mendojë njëjtë si një i “Levicës” për çështjen shqiptare në vend”?

Pavarësisht vula e kujt qëndron, 28 janari 2024 është datë historike, për shqiptarët dhe avancimin e pozitës së shqiptarëve. Të kujt janë meritat, çfarë ngjyra partiake ka kryeministri shqiptar është çështje e debatit të përditshëm politik e besa edhe demokratike, por me kujdes që në asnjë moment të mos zbehet nami historik. Shkurt, nuk mund ta ulin rëndësinë e të parit të Qeverisë ata që mendojnë njëjtë si “Levica” -në raport me kryeministrin e ardhshëm shqiptar.